راپور: داود جبارخیل
د کابل ـ مزارشریف پر لویه لاره د یوې خونړۍ ترافیکي پېښې له امله د ناوې او زوم په ګډون ۱۲ کسانو خپل ژوند له لاسه ورکړی دی.
د راپورونو له مخې، پېښه هغه مهال رامنځته شوې چې یو مسافر وړونکی موټر له بل باروړونکي موټر سره ټکر شوی دی. ویل کېږي چې په قربانیانو کې ناوې، زوم او د هغوی د کورنۍ یو شمېر غړي هم شامل دي.
ځايي سرچینې وایي، په دې پېښه کې یو شمېر نور کسان ټپیان شوي چې د درملنې لپاره نږدې روغتیايي مرکزونو ته لېږدول شوي دي.
د پېښې د رامنځته کېدو اصلي لامل تر اوسه په رسمي ډول نه دی څرګند شوی، خو د افغانستان پر لویو لارو د ترافیکي اصولو نه مراعت، چټک سرعت او د سړکونو خراب وضعیت د ورته پېښو عمده عوامل بلل کېږي.
د یادې پېښې له امله سیمهییزو خلکو خواشیني څرګنده کړې او له موټرچلوونکو یې غوښتي چې د سفر پر مهال ترافیکي اصول په جدي ډول مراعت کړي.
