د منځنۍ ختيځ کړکېچ
د منځني ختیځ امنیتي وضعیت یو ځل بیا د خطر له نوې مرحلې سره مخ شوی، وروسته له هغې چې متحده عربي اماراتو اعلان وکړ د دغه هېواد یوې اټومي بټۍ ته نږدې د برېښنا پر یوې کارخونې ډرون بریدونه شوي دي. که څه هم اماراتي چارواکي وایي چې په پېښه کې مرګ ژوبله نه ده اوښتې او د اټومي وړانګو د خپرېدو کوم ګواښ هم نه دی رامنځته شوی، خو دا پېښه د سیمې د امنیتي وضعیت په اړه جدي اندېښنې راپارولي دي.
د نړیوالو رسنیو د راپورونو له مخې، برید د انرژۍ پر یوه مهم تاسیس ترسره شوی چې د اټومي بټۍ ترڅنګ موقعیت لري. امنیتي سرچینې وایي، د برید هدف ښايي د انرژۍ بنسټیزې زېربناوې وې، څو د سیمې پر اقتصادي او سیاسي وضعیت فشار زیات شي.
بل لور ته سعودي عربستان هم ویلي چې د عراق له خاورې درې ډرون الوتکې د سعودي فضا پر لور روانې وې، خو د سعودي دفاعي ځواکونو له لوري شنډې شوې دي. سعودي چارواکو تر اوسه د دغو ډرونونو د اصلي لوري او موخې په اړه بشپړ جزئیات نه دي ورکړي، خو سیمه ییز شنونکي دا پېښې د منځني ختیځ د روانو سیاسي او پوځي سیالیو برخه بولي.
اټومي انرژۍ بټۍ ته نږدې ډرون برید
په همدې حال کې د اټومي انرژۍ نړیوالې ادارې له ټولو ښکېلو خواوو غوښتي چې اټومي بټیو او حساسو انرژۍ مرکزونو ته نږدې له هر ډول بریدونو ډډه وکړي. ادارې خبرداری ورکړی چې پر دغو تاسیساتو هر ډول برید نه یوازې د یوې سیمې، بلکې د ټولې نړۍ لپاره جدي بشري او چاپېریالي خطرونه رامنځته کولی شي.
دا ټول پرمختګونه داسې مهال رامنځته کېږي چې د امریکا ولسمشر Donald Trump پر ایران سختې څرګندونې کړې دي. ټرمپ ایران ته خبرداری ورکړی چې د واشنګټن له غوښتنو سره سم هوکړې ته چمتو شي، کنه د هغه په وینا “له سختو او بدو پایلو” سره به مخ شي. د نوموړي دغه څرګندونې د امریکا او ایران ترمنځ د کړکېچ د لا زیاتېدو نښې ګڼل کېږي.
سیاسي شنونکي باور لري چې که د سیمې هېوادونه د ډیپلوماسۍ پر ځای پوځي فشار ته دوام ورکړي، نو منځنی ختیځ به له یوې نوې او پراخې ترینګلتیا سره مخ شي. په ځانګړي ډول د انرژۍ او اټومي تاسیساتو امنیت د نړۍ لپاره حیاتي اهمیت لري، ځکه هر ډول ناامني کولی شي د نړیوال اقتصاد، تېلو بازار او سیمهییز ثبات پر وضعیت مستقیم اغېز وکړي.
