ويب ډيسک
د بلوچستان په بېلابېلو سیمو کې د تېرو دوو ورځو په ترڅ کې د وسلهوالو په بریدونو کې د امنیتي ځواکونو په ګډون تر ۲۰ زیات کسان ټپیان شوي دي، او د رېل پټلۍ ته د زیان اوښتو له امله د جعفر ایکسپریس خدمت هم ځنډول شوی دی.
د پولیسو په وینا، د یکشنبې په شپه د کوټې د سریاب روډ په سیمه کې د ایف سي (سرحدي ځواک) د وینګ پر مرکزي دفتر نامعلومو وسلهوالو ډزې وکړې او څو لاسي بمونه یې وغورځول. په دې برید کې درې ایف سي سرتېري ټپیان شول.
د شالکوټ د ایس ډي پي او خضر حیات په وینا، د ډزو او چاودنو له امله یو لاروی وژل شوی او ۱۲ نور کسان ټپیان شوي، چې پکې یو کم عمره کرکټ لوبغاړی هم شامل دی. ټپیان د کوټې ملکي روغتون ته لېږدول شوي دي.
تر دې وړاندې، د یکشنبې په ماښام د کوټې په شاوخوا اغبرګ سیمه کې موټرسایکل سپرو کسانو پر یوه پولیسو پوسته برید وکړ چې پکې یو پولیس سرتېری لږ ټپي شو.
بریدګرو نږدې ولاړه یوه شخصي موټر هم وسوځاوه.
بلخوا، د مستونګ ولسوالۍ د دښت په سیمه کې د رېل پله لاندې چاودنه شوې چې له امله یې پل ته جزوي زیان اوښتی دی.
د رېل ادارې په وینا، د دې پېښې وروسته پېښور ته تلونکی جعفر ایکسپریس اورګاډی لغوه شوی، او له پېښوره راتلونکی اورګاډی په جیکب آباد کې درول شوی دی.
د نوشکي ولسوالۍ د احمدوال سیمې ته نږدې هم په دوو جلا ځایونو کې د چاودنو له امله د رېل پټلۍ ته زیان اړول شوی دی.
بل لور ته، د دوشنبې په سهار وختي د جهل مګسي ولسوالۍ د کوټړه په سیمه کې پر یوه پولیس تاڼه وسلهوالو برید وکړ.
د پولیسو د ځوابي ډزو پر مهال یو ۱۱ کلن ماشوم وژل شوی او د ایس ایچ او په ګډون پنځه کسان ټپیان شوي دي.
د صوبایي حکومت په وینا، په کوټه کې د ترهګرۍ دوه هڅې شنډې شوې دي.
د کورنیو چارو د ادارې ویاند بابر یوسفزئی ویلي چې امنیتي ځواکونو پر وخت اقدام کړی او بریدګر یې شاتګ ته اړ کړي، خو د تېښتې پر مهال د هغوی د ډزو له امله یو شمېر ملکیان ټپیان شوي دي.
هغه زیاته کړه چې په ټول صوبه کې امنیتي حالت لوړ کړی شوی او د خلکو د ساتنې لپاره اقدامات روان دي.
