ویب ډیسک
د اسرائيلو د سرچينو له مخې، امريکا او اسرائيل د ايران د جګړې پای وروسته پړاو لپاره يو پټ پلان جوړوي، چې موخه يې دا ده چې په ايران کې د نظام د بدلون لپاره مناسب حالات برابر شي.
د راپور له مخې، د دې پلان وروستۍ موخه دا ده چې د ايران له خلکو سره مرسته وشي، څو وکولای شي خپل حکومت بدل کړي، خو وروستۍ پرېکړه به بيا هم د ايران د خلکو په لاس کې وي، لکه څنګه چې اسرائيلي ورځپاڼې «اسرائيل هيوم» خبر ورکړی.
په راپور کې ويل شوي چې په دې پلان کې ځينې ښکاره ګامونه هم شامل دي، چې د ايران خلکو ته به سمدستي او نېغه مرسته ورکړي، که هغوی په هېواد کې د مشرۍ د بدلولو هڅه وکړي.
خو د پلان تخنيکي برخې پټې ساتل شوې دي، څو دښمن پرې خبر نه شي.
د پلان له مخې، اصلي بدلون به خپله د ايران خلک راولي، نه د امريکا يا اسرائيلو پوځونه. سربېره پر دې، دواړه هېوادونه غواړي چې بديله مشري د ايراني ټولنې له مهمو برخو څخه راټوکېږي، نه له لږکيو ډلو لکه کردانو يا اذريانو څخه.
په راپور کې دا هم ويل شوي چې د جګړې په پيل کې تمه نه کېده چې د ايران خلک به کوڅو او سړکونو ته راووزي. د جګړې په لومړۍ ورځ د امريکا پخواني ولسمشر ډونالډ ټرمپ د ايران خلکو ته وويل:
«په خپلو کورونو کې خوندي پاتې شئ. بهر وتل ډېر خطرناک دي. ډېر بمبار به وشي. وروسته به تاسې وکولای شئ خپل حکومت تر ولکې لاندې راوړئ، حکومت د خلکو ملکيت دی.»
همدارنګه د اسرائيلو لومړي وزير بنيامين نتنياهو هم ويلي دي:
«د رښتيا شېبه نږدې ده. زموږ موخه دا نه ده چې ايران ووېشو، بلکې دا ده چې هغه له استبداده آزاد کړو. په پای کې آزادي ستاسو پورې تړلې ده.»
سره له دې، اسرائيلي چارواکي وايي چې د نظام بدلون په بشپړه توګه د ايران د خلکو پر خوځښت پورې تړلی دی او د دې د بريا هېڅ ډاډ نشته.
د سرچينو په وينا دا هم روښانه نه ده چې د نظام د نسکورولو هڅې به د جګړې له پای سره سم پيل شي او که به ژر پايله ورکړي.
د پلان له مخې، ښايي بدلون څو اوونۍ يا څو مياشتې وروسته رامنځته شي، نه دا چې سمدستي.
سرچينې زياتوي چې د پوځي پلان په عملي کولو کې چټکتيا راغلې ده او دا بهير د تمې په پرتله ډېر تېز روان دی. په لومړنيو اټکلونو کې ويل شوي وو چې جګړه ښايي له څلورو تر پنځو اوونيو پورې دوام وکړي، خو د اوسني اټکل له مخې ښايي امريکا او اسرائيل پر ايران خپل بريدونه تر دې هم مخکې ودروي.
