ويب ډيسک
د طالبانو د حکومت د بهرنیو چارو وزارت سیاسي معین شیر محمد عباس ستانکزي په افغانستان کې د ښځو او نجونو پر زده کړو بندیز ته یو ځل بیا تُندغبرګون ښودلې او ویلي دي چې د زده کړو د بندیز پریکړه د ” اسلامي شریعت” پر اساس نه ده بلکې د طالبانو ” طبیعت” پر اساس پریکړه کړه.
شیر محمد عباس ستانکزي د شنبې د ورځې ناوخته جنورۍ ۱۸( مرغومې ۲۹) د ایکس پر خپله پاڼه د خپلې هغې وینا یوه برخه خپره کړې چې د خوست په ولایت کې د یوې دیني مدرسې د فارغونو د فراغت غونډې ته یې په همدې ورځ کړې ده.
هغه ویلي: “په افغانستان کې د نجونو او ښځو پرمخ د ښوونځیو او پوهنتونونو دروازو د تړلو لپاره هیڅ بهانه او دلیل وجود نلري”.
هغه وویل: ” په دې برخه کې هیڅ بهانه او دلیل نشته دی. د جناب رسول الله صاحب په زمانه کې د علم دروازې د ښځو او سړیو پر مخ پرانیستې وې … د همدې مسلې له امله نن ورځ ټوله نړۍ له مونږ سره ښکیل ده او په همدې دلیل پرمونږ انتقاد کوي. په کومه لار چې مونږ روان یو دا د طبیعت خبره ده نه د شریعت”.
د طالبانو د حکومت دغه لوړ پوړې چارواکي وویل چې د افغانستان د ۴۰ میلیونو وګړو له ډلې د نیمايي ۲۰ میلیونو پر وړاندې د طالبانو بې عدالتي روانه ده. هغه وویل چې هغوی د قیامت پر ورځ په اړه نجونو او ښځو ته ځواب ورکوونکي دي.
