ویب ډیسک
د افغانستان د بیارغونې لپاره د امریکا ځانګړې څارونکې ادارې یا سیګار اعلان کړی، چې تر ۱۷ کلن فعالیت وروسته به په رسمي ډول خپل ماموریت پای ته ورسوي.
یادې ادارې تېره شپه ناوخته ویلي، چې د ۲۰۲۶ کال د جنورۍ ۳۱مه به یې وروستۍ کاري ورځ وي.
سیګار په ۲۰۰۸ کال کې د امریکا د کانګرس له خوا د دې لپاره تاسیس شوې وه، څو په افغانستان کې د امریکا د مرستو او بیارغونې پروژې او ماموریتونه وڅاري.
سیګار د خپل فعالیت پر مهال په ځلونو د اداري فساد، درغلیو او د مرستو د ناوړه استفادې راپورونه او د افغان دولت د چارواکو په وینا، ادعاوې خپرې کړې دي.
دې ادارې له ټولو هغو کسانو مننه کړې، چې د سیګار له خپلواک څارنیز کار سره یې همکاري کړې ده.
معلومات ښيي، چې تر دې وړاندې د سیګار مشر له کانګرس غوښتي وو، چې له افغانستان سره د امریکا د مرستو د کموالي له امله دې د یادې ادارې ماموریت پای ته ورسول شي.
سیګار په خپل وروستي راپور کې وړاندیز کړی و، چې له ۲۰۲۶ مالي کال وروسته دې د افغانستان لپاره د مرستو د څار مسوولیت د امریکا نړیوالې پراختیايي ادارې یا USAID ته ورکړل شي.
سیګار ویلي، امریکا له افغانستانه تر وتلو وروسته هم د دغه هېواد تر ټولو لوی تمویلونکی و او یوازې د طالبانو تر واکمنۍ لاندې افغانستان سره یې شاوخوا ۳،۸ میلیارده ډالر مرسته کړې ده.
