د افغانستان د بهرنیو چارو وزارت د بلوچستان ایالت د کوټې ښار کې پر مسافر وړونکي اورګاډي شوي برید په کلکو ټکو غندلی دی.
د یاد وزارت له لوري په خپره شوې اعلامیه کې ویل شوي، هغه برید چې د عامو مسافرو پر لېږدونکي اورګاډي ترسره شوی، له امله یې ګڼ شمېر ملکي وګړي وژل شوي او ټپیان دي.
د افغانستان د بهرنیو چارو وزارت ټینګار کړی چې د ملکي وګړو وژل او زیانمنول، که د هرې ډلې له خوا او په هر ډول ترسره کېږي، د غندنې وړ عمل دی.
وزارت همداراز د پېښې د قربانیانو له کورنیو سره ژوره خواخوږي او ډاډګیرنه څرګنده کړې ده.
