ويب ډیسک
د پاکستان د بهرنیو چارو وزیر بلاول بوټو زرداري د یوه خبرې غونډې پر مهال ویلي، موږ به له نړیوالۍ اجماع پرته طالبانو په رسمیت ونه پېژنو.
زرداري همداراز خبرداری ورکړی چې “د طالبانو پر وړاندې د نړۍ صبر مخ په ختمېدو دی، خو له دغو ننګونو سربېره، موږ له افغانستان سره د اړیکو د ساتلو غوښتنه او ټینګار کوو، باید د تېرو تېروتنو تکرار ونه کړو.”
د پاکستان د بهرنیو چارو وزیر همداراز له طالبچارواکو وغوښتل چې د افغانانو او نړۍ سره خپلې کړې ژمنې په ټوله کې د نړیوالې ترهګرې سره د مبارزې، بشري حقونو ته درناوی او ښځو ته د تعلیم لاسرسي برخو کې پوره کړي.
دا په داسې حال کې ده چې د طالبانو بیا واکمېدو وروسته د پاکستان، چین او روسیې په ګډون یو شمېر هېوادونو په کابل کې خپل ډیپلوماټیکې څانګې پرانیستي وساتلې، خو تر اوسه هېڅ بهرني حکومت د بشري حقونو او ترهګرۍ د اندېښنو له کبله طالبانو په رسمیت نه دي پېژندلي.
