ويب ډیسک
د قطر د بهرنیو چارو وزیر شیخ محمد بن عبدالرحمن ال ثاني په سویس کې د داووس اقتصادي نړیوال فورم د سرمشریزي په درشل ویلي دي چې د طالبانو وروستۍ پریکړې «ډېرې مایوسه کوونکې» دي. هغه ټینګار کړی چې دوحه له نورو اسلامي هېوادونو سره په ګډه غواړي چې په کندهار کې له طالب چارواکو سره خبرې وکړي.
د قطر د بهرنیو چارو وزیر شیخ محمد بن عبدالرحمن آل ثاني د سه شنبې په ورځ په سویس کې د داووس په اقتصادي غونډه کې وویل چې د طالبانو وروستۍ پرېکړې “ډیرې مایوسه کوونکي” دي، خو د هغه په وینا، دوحه به د بدلون راویستلو لپاره یوازینۍ لارې تعامل ته دوام ورکړي.
د رویټرز خبري اژانس په خبره چې دوحه له نورو اسلامي هېوادونو سره هم مشوره کوي چې په کندهار کې له طالب چارواکو سره خبرې وکړي او “په داسې حال کې چې دا به اسانه نه وي، خو دا مهمه ده چې هڅو ته دوام ورکړو”
د دې غونډې په څنډه کې د قطر د بهرنیو چارو وزیر هم د CNBC تلویزیون ته ویلي: “زموږ په اند د طالبانو ټولې کړنې او پریکړې خورا مایوسه کوونکي دي. موږ هڅه کوو چې پوه شو چې د دې پریکړو تر شا منطق څه دی. زه د دې پریکړو تر شا مذهبي یا حتی کلتوري معقولیت نه وینم.
شیخ محمد بن عبدالرحمن ال ثاني دغې شبکې ته ویلي، د طالبانو ګڼ شمېر څېرې چې له دوی سره اړیکې لري، منځلاری غبرګون ښيي. هغه زیاته کړې ده:
“موږ له دوی سره خبرې کوو، په ځانګړي توګه هغه څوک چې موږ ورسره خبرې کوو یو منځلاری غبرګون ښیې خو په عمل کې داسې څه نه لیدل کیږي. موږ نه پوهیږو چې د دې ډول پریکړو انګیزه څه ده. دا یوازې پاروونکی دی او د دوی او د افغانستان د خلکو وضعیت لا پسې خرابوي.»
طالبان چې د ۲۰۲۱ کال په اګست کې یې په افغانستان کې واک ترلاسه کړ، پر ښځو ډېر محدودیتونه وضع کړي دي.
د ښځو په کار او زده کړو بندیز یو له هغو بندیزونو دی چې نړیوال غبرګونونه یې پارولي دي.
د یادونې وړ ده چې قطر له څو کلونو راهیسې د طالبانو د سیاسي دفتر کوربه دی او د امریکا او طالبانو ترمنځ د سولې په تړون کې یې مهم نقش لوبولی دی.
