پښتو جرنل
د پښتونخوا ملي عوامي ګوند مشر، د پاکستان د ایین د تحفظ تحریک مشر، او د قامي اسمبلۍ غړی محمود خان اڅکزي د اختر په څلورمه ورځ د زیارت په فوټبال میدان کې یوې سترې ولسي غونډې ته وینا وکړه. نوموړي وویل: “موږ د هیچا دښمنان نه یو او د کرکې سیاست نه کوو. موږ د انسانیت، برابري، د ایین واکمني، او د قانون د بالادستۍ پلویان یو.”
مشر سیاستوال زیاته کړه: “زورور قوتونه زموږ پر وسایلو سترګې اچولي، خو موږ به هېڅکله هم خپل اییني، قانوني، او تاریخي حقونه پرېنږدو. د ظالم او مظلوم ترمنځ جګړه کې، موږ به تل د مظلوم ترڅنګ ولاړ یو. موږ یو ښه او پرمختللی پاکستان غواړو، خو د برابري او متقابل احترام په بنسټ.”
اڅکزي ټینګار وکړ چې په څو قومي او څو کلتوري هېواد کې، پرته له د ایین واکمني او د قانون بالادستۍ، د جمهوریت او پرمختګ خوبونه خیالونه دي. ویې ویل چې پښتانه ملت په تاریخ کې هر ډول ستونزې ګاللي دي او د عنعنوي جرګو له لارې یې وحدت موندلی. “موږ د دې وحدت بنسټ له بنو څخه ایښی، او دا لړۍ به دوام لري.”
د افغانستان په اړه یې وویل چې پښتونخوا ملي عوامي ګوند د افغانستان خپلواکي او حاکمیت ته درناوی لري، او د چین دیپلوماتیکو هڅو ته هم د قدر په سترګه ګوري.
د بلوچانو په اړه یې وویل: “که بلوچان موږ د برابري پر اساس وروڼه ګڼي، نو موږ به هم په هر مشکل کې ورسره ولاړ یو. او که حالات يي مجبور کړي، موږ دا حق لرو چې خپله صوبه اعلان کړو.”
د ایین خلاف ورزیو ته په اشارې سره نوموړي وویل چې تحریک انصاف (PTI) باید تر هغه وخته د پارلمان کارونه وځنډوي ترڅو چې عمران خان او نور سیاسي بندیان خوشي نه شي. نوموړي وړاندیز وکړ چې له اختر وروسته باید هر جمعه له ماسپښین لمونځ وروسته د مسجدونو مخې ته د ایین د واکمنۍ، جمهوریت، پارلماني خودمختارۍ، او د سیاسي بندیانو د خوشې کولو لپاره مظاهرې وشي.
د واکمن اشرافیې پر ضد نیوکه کې یې وویل: “هغوی د لوټل شوې شتمنۍ نه مالونه جوړ کړي، او بیا ورته وايي ‘دا د زما د رب فضل دی’. پر سرحدي تجارت بندیز لګول زموږ د ماشومانو له خولې ډوډۍ اخستل دي. په دغو سیمو کې د ژوند کولو بله هېڅ لاره نشته پرته له تجارت.”
د افغان کډوالو په اړه یې په کلکه د هغو کسانو زور زیاتی وغنده چې قانوني اسناد لري یا په پاکستان کې زېږېدلي دي. ویې غوښتل چې څوک چې دلته زېږېدلي یا د پاکستاني وګړو سره واده کړي، هغوی ته دې تابعیت ورکړل شي.
نوموړي وپوښتل: “د پاکستان بهرني پورونه څومره زموږ په سیمو کې لګېدلي؟ که موږ ته حساب راکړل شي، موږ د هغې دوه چنده ادا کولو ته تیار یو.”
اڅکزي زیاته کړه: “زموږ خاوره له وسایلو ډکه ده، خو پښتانه اړ ایستل شوي چې د رزق لپاره د ملک په نورو برخو او بهر ته مزدورۍ ته لاړ شي. اوس مهال یو غیر قانوني او غیر منتخب حکومت پر هېواد تپل شوی — دا د زور، درغلۍ، او پیسو له لارې جوړ شوی دی.”
هغه وویل: “هغه ګوند چې انتخابات یې ګټلي، مشران یې زنداني شوي، خو څوک چې ښکاره درغلي کړې، هغوی حج او عمرې ته روان دي. حیرانتیا دا ده چې هلته به څنګه خپل ضمیر ته ځواب ورکوي. د نړیوال بانک د وروستي راپور له مخې، د پاکستان شاوخوا ۴۵ سلنه ولس د غربت تر کرښې لاندې تللی. ولس وږی دی، خو جعلي واکداران د ترقۍ او اقتصاد دعوې کوي.”
