ويب ډيسک
د پخواني لومړي وزیر عمران په مشرۍ د پاکستان د تحریک انصاف ګوند یو بنسټګر، ډاکټر شهید صدیقي په یو برید کې لومړی ټپي او بیا وژل شوی دی.
ډان ورځپاڼې راپور ورکړی چې صدیقي جمعه د اګست پر ۲مه، غرمه مهال د لاهور ښار د والنسیا په بلوک ایچ سیمه کې له جوماته د وتلو پرمهال په ډزو لګېدلی دی.
هغه وسلهوال کس چې د تحریک انصاف ګوند غړی یې څلور ډزه وویشت او ټپي یې کړ، له سیمې تښتېدلی دی.
د راپور پر بنسټ، صدیقي چې په دې پېښه کې سخت ټپي شوی و، په روغتون کې ساه ورکړه.
پولیسو د صدیقي مړی عدلي طب ته لېږدولی او د پېښې په تړاو یې پلټنې پیل کړې دي.
د تحریک انصاف ګوند د دغه برید په غندلو سره اعلان کړی چې د خپل بنسټګر له کورنۍ سره به د عدالت تر پلي کېدو پورې په څنګ کې پاتې شي.
تر اوسه د دې وژنې لامل او انګیزه نه ده څرګنده، ځکه د صدیقي زوی ویلي چې دوی له هیچا سره شخصي دښمني نه لري.
دا په داسې حال کې ده چې دوه اوونۍ دمخه د پاکستان د اطلاعاتو وزارت خبر ورکړی و چې د عمران خان ګوند د فعالیتونو مخنیوی کوي.
