ويب ډیسک
د ملګرو ملتونو امنیت شورا ویلي، د طالبانو وروستیو اقداماتو په اړه چې له مخې یې ښځې د تحصیل او په نادولتي موسسو کې له کار کولو منع شوي دي، ژوره اندېښنه لري.
دغې شورا افغانستان کې د ښځو او نجونو د پوره، برابرې او مانا لرونکي ګډون غوښتنه کړې او له طالبانو یې غوښتي چې د ښوونځیو او پوهنتونونو دروازې د نجونو پر مخ پرانیزي.
د دې شورا غړو په یوه خبرپاڼه کې ټینګار کړی چې د ښځو پر کار بندیز به افغانستان کې پر بشري چارو جدي اغېز وکړي.
دا په داسې حال کې ده چې د نجونو پر مخ د تعلیمي او تحصیلي مرکزونو د دروازو تړل او په نادولتي موسسو کې د ښځو پر کار کولو بندیز ډېر غبرګونونه راوپارول او د نړۍ د بېلابېلو هېوادونو استازو او لوړ پوړو چارواکو د طالبانو دغه کړنه وغندله.
