ویب ډیسک
د پاکستان د مذهبي چارو وزیر مفتي عبدالشکور اعلان کړی چې سږ کال به د حج لګښت تر شپږ نیم لکه روپیو ورټیټ کړي.
د پاکستان دولتي راډیو ویلي چې دا خبره نوموړي د مې پر ۲۶مه په قامي اسمبلۍ کې د وینا پر مهال کړې ده.
عبدالشکور ویلي چې د حج کوونکو لپاره یې په مکه او مدینه کې په ارزانه بیه د اوسېدو ځایونه نیولي دي.
هغه ویلي، هڅه کېږي چې د دې لپاره لګښتونه نور هم کم کړي چې عام خلک هم په اسانه حج وکړای شي.
پاکستانۍ رسنۍ وايي، له حکومتي تګلارې سره سم، سږ کال د حکومت په مرسته د حج احتمالي لګښت شاوخوا نهه لکه روپۍ ټاکل شوی وو.
دا په داسې حال کې ده چې سعودي عرب اعلان کړی دی چې سږ کال به حج ته د ورتلونکو خلکو شمېر زیاتوي. خو حاجیان به له کورونا وایرسه د ځان ساتلو احتیاطي لارښوونې عملي کوي.
دا تر هغې وروسته ده چې تېر دوه کاله د کورونا وایرس جهاني وبا د کنټرولولو په موخه له بهرنیو هېوادونو څخه سعودي عرب ته د خلکو پر تګ بندیز وو.
