د سعودي عربستان چارواکي وایي، د مدینې منورې په سیمه کې شاوخوا ۱۱۰ میلیونه ټنه خام معدني مواد موندل شوي چې په ترکیب کې یې یورانیم او نادر معدني عناصر هم شامل دي.
د بهرنیو رسنیو د راپورونو له مخې، د سعودي د انرژۍ وزیر شهزاده عبدالعزیز بن سلمان دغه څرګندونه د اتریش په پلازمېنه ویانا کې د نړیوالې اټومي انرژۍ ادارې د عمومي کنفرانس پر مهال کړې ده.
نوموړي ویلي، د مدینې په جبل صاید پروژه کې د کیندنو او ځمکپوهنیزو څېړنو پر مهال د دغو زیرمو شتون اټکل شوی دی.
د سعودي چارواکو په وینا، په یادو زیرمو کې یورانیم او ځینې نادر معدني توکي هم شته.