د خېبر پښتونخوا په بېلابېلو سيمو کې د اګست له ۳۰مې نېټې راهيسې د سختو بارانونو له امله د کورونو د چتونو او دېوالونو د نړېدو په پېښو کې دوه کسان مړه او درې نور ژوبل شوي دي.
د طبيعي افتونو پر مهال د نظم صوبايي ادارې (پي ډي اېم اې) د سپټمبر په لومړۍ نېټه په خپاره کړي راپور کې ويلي، چې په مړو شويو کسانو کې يوه ښځه او يو ماشوم شامل دي، په داسې حال کې چې د ژوبلو کسانو په ډله کې يو سړی، يوه ښځه او يو ماشوم دي.
د ادارې د شمېرو له مخې، د سختو بارانونو له امله د صوبې په بېلابېلو ضلعو کې نهه کورونه هم زيانمن شوي دي. له دې ډلې پنځه کورونه يو څه زيانمن شوي، خو څلور نور په بشپړه توګه نړېدلي دي.
د کورونو د نړېدو پېښې په بونېر، مردان، مومندو او شانګله ضلعو کې ثبت شوې دي.
خېبر پښتونخوا هر کال د بارانونو پر مهال د ناڅاپي سېلابونو، ځمکښوېدنو او د کمزورو ودانيو د نړېدو له ګواښ سره مخ کېږي. په غرنیو سيمو کې د سختو بارانونو پر مهال کورونه، سړکونه او د اوبو د تېرېدو لارې تر نورو ډېرې اغېزمنېږي.
پي ډي اېم اې وايي، له ژغورنې ادارې، سيمهييزې ادارې او نورو اړوندو بنسټونو سره يې اړيکې دوام لري او په زيانمنو سيمو کې د مرستې او ژغورنې چارې روانې دي.
د ادارې مشر له خلکو غوښتي چې د خراب موسم پر مهال له اړتيا پرته له سفر کولو ډډه وکړي، له حساسو سيلانيزو سيمو لرې پاتې شي او د هوا د حالاتو په اړه د حکومتي ادارو خبرداري او لارښوونې په پام کې ونيسي.
د پي ډي اېم اې د معلوماتو له مخې، د بېړنيو حالاتو د څار او همغږۍ مرکز يې هم فعال دی او له اړوندو ادارو سره د ژغورنې او مرستې د چارو لپاره پرلهپسې همغږي روانه ده.