په وینزویلا کې د دوو پرلهپسې زورورو زلزلو له امله د مړو شمېر ۱۸۸ تنو ته رسېدلی او له ۱۵۰۰ څخه ډېر کسان ټپیان شوي دي.
د راپورونو له مخې، د ژغورنې ډلې لا هم د پلازمېنې کاراکاس او د لا ګایرا ایالت په نړېدلو ودانیو کې د کنډوالو لاندې د ایسارو شویو کسانو د موندلو او ژغورلو هڅې روانې ساتلې دي.
د ملګرو ملتونو د معلوماتو له مخې، په دې ناورین کې له ۱۰۰ څخه زیاتې ودانۍ نړېدلې او ګڼې نورې سختې زیانمنې شوې دي، چې له امله یې زرګونه کورنۍ بېځایه شوې دي.
د امریکا د ځمکپوهنې ادارې (USGS) د معلوماتو له مخې، د رېښتر په کچه د ۷.۲ او ۷.۵ درجې دوه پیاوړې زلزلې د یوې دقیقې په واټن کې شوې دي. دویمه زلزله په وینزویلا کې له ۱۹۰۰ کال راهیسې تر ټولو زوروره بلل کېږي.
بل لور ته، د نړۍ یو شمېر هېوادونو او نړیوالو مرستندویه بنسټونو له زلزله ځپلو سره د بېړنیو بشري مرستو ژمنه کړې او ویلي یې دي چې د ژغورنې او بیارغونې په چارو کې به له وینزویلا سره همکاري وکړي.
