ويب ډيسک
د ازبېکستان ولسمشر، شوکت میرضیایف په کنایه ډول طالبانو ته ویلي، دغه هېواد تل له افغانستان سره رېښتینی او رغنده دریځ درلود.
هغه زیاته کړې چې د افغانستان پرمختګ د ګاونډیو هېوادونو له رغنده تعامل پرته ممکن نهدی.
میرضیایف همداراز څرګنده کړې چې ډېری هغه کسان چې په پیل کې د افغانستان په اړه د تاشکند د تعامل له پالیسۍ سره مخالف وو، اوس یې په ښه اقدام اعتراف کوي.
د ازبکستان ولسمشر، شوکت میرضیایف، له ۲۰۱۶ کال راهیسې واکمن دی او د خپلې واکمنۍ پر مهال یې د افغانستان په اړه د ازبکستان بهرنی سیاست د تعامل او همکاریو پر بنسټ تنظیم کړی. تاشکند له طالبانو سره له ۲۰۱۸ کال راهیسې اړیکې لري او د افغانستان د اقتصادي ثبات، ټرانسپورتي دهلیزونو، او بشري مرستو په برخو کې رغنده رول لوبوي.
ازبکستان د طالبانو د حکومت له رسمیت پېژندلو ډډه کړې، خو له هغوی سره یې پراخ تعامل ساتلی دی. دا تعامل د دواړو هېوادونو ترمنځ د سوداګرۍ، برېښنا صادراتو، او اورګاډي پټلۍ پروژو ته لار هواروي.
