ويب ډیسک
د خیبر ضلعې په لرې پرته سیمه کې د عملیاتو پر مهال د پاکستان قانون پلي کوونکو ادارو د شیعه ګانو په جومات کې د وسله والو او ځانمرګي برید تر شا درې مشکوک ترهګر وژلي دي.
کله چې یوه ځانمرګي بریدګر تېره اوونۍ د جمعې په ورځ د کوچې ریسلدار جومات کې دننه خپل چاودېدونکي واسکټ ته چاودنه ورکړه. د برید پړه د اسلامي دولت وسله والو ډلې په غاړه واخیسته.
چارواکي وايي، د ترهګرۍ پر وړاندې د مبارزې ادارې کارمندانو، پولیسو او استخباراتي ادارو د سه شنبې په شپه ناوخته د جمرود تحصیل په غواریزه سیمه کې په یوه کور چاپه وهلې ده. ویل کیږي چې په کور دننه یو ترهګر د قانون په منسوبینو ډزې کړي دي.
چارواکو د پاکستان ورځپاڼۍ ډان نیوز ته وویل: «د عبدالواجد، مظفر شاه او محمد طارق په نوم پیژندل شوي درې ترهګر له پولیسو سره د ډزو په تبادله کې ووژل شول او د دوو لاسپوڅو په ګډون څلور نور د پېښې له ځایه په تېښته بریالي شول.»
