ويب ډیسک
د پاکستان د اطلاعاتو پخواني وزیر فواد چوهدري وایي، ترهګر پاکستان کې بریدونه کوي او بېرته افغانستان ته تښتي.
فواد چوهدري همداراز ویلي دي چې د افغانستان طالبانو له مرستې پرته پاکستاني طالبان له منځه نه شي تللی.
د طالبانو د بهرنیو چارو وزیر امیرخان متقي د پېښور په پولیس لاین برید ته غبرګون کې ویلي ؤ چې پاکستان دې د برید څېړنه وکړي او د خپل بام واورې دې په نورو نه اچوي.
دا لومړی ځل نه دی چې پاکستاني چارواکي پر طالبانو د ترهګرو د ملاتړ نیوکه کوي، له دې وړاندې د پاکستان د کورنیو چارو وزیر رانا ثناء الله هم ویلي ؤ چې ترهګر په افغانستان کې ځالې لري.
دا په داسې حال کې ده چې د طالبانو له بیا واکمنېدو وروسته، پاکستان کې ناامني مخ په زیاتېدو ده.
د دې هېواد د شخړو او امنیت د مطالعاتو انسټیټوټ په یوه راپور کې ویلي، د ۲۰۲۳ کال په لومړۍ میاشت کې، د پاکستان په کچه ۴۴ بریدونه شوي چې ۱۳۴ تنه په کې وژل شوي او ۲۵۴ نور ټپيان دي.
