راپور: داود جبارخیل
د ننګرهار ولایت امنیتي چارواکو ویلي، چې د سرخرود ولسوالۍ د شیخ مصري په سیمه کې د کورني تاوتریخوالي په یوه خونړۍ پېښه کې یوه سړي خپله مېرمن او لور وژلي او زوی یې ټپي کړی دی.
د ننګرهار امنیه قوماندانۍ د معلوماتو له مخې، امنیتي ځواکونو د پېښې له رامنځته کېدو وروسته سمدستي اقدام کړی او تورن کس یې نیولی دی. چارواکي وایي، نیول شوي کس په لومړنیو پلټنو کې د خپلې مېرمنې او لور د وژنې اعتراف کړی او ویلي یې دي، چې دغه عمل یې د کورنیو اختلافاتو له امله ترسره کړی دی.
د امنیتي سرچینو په وینا، په پېښه کې ټپي شوی زوی روغتیايي مرکز ته لېږدول شوی او روغتیايي وضعیت یې د ډاډ وړ ښودل شوی دی.
دا پېښه په داسې حال کې رامنځته کېږي، چې په وروستیو ورځو کې د افغانستان په بېلابېلو ولایتونو کې د کورني تاوتریخوالي، کورنیو شخړو او د کورنۍ د غړو ترمنځ د تاوتریخوالي ورته پېښې هم ثبت شوې دي، چې د خلکو اندېښنې یې زیاتې کړې دي.
ټولنیز فعالان او د بشري حقونو مدافعین وایي، اقتصادي ستونزې، بېکاري، رواني فشارونه، د شخړو د حل لپاره د سالمو لارو نشتوالی او د کورني تاوتریخوالي په اړه د پوهاوي کمښت هغه عوامل دي چې په ځینو مواردو کې د داسې دردناکو پېښو لامل ګرځي.
د سیمې اوسېدونکي وایي، د کورنیو اختلافاتو پای باید هېڅکله تاوتریخوالی او وژنه نه وي. دوی له مسؤلو ادارو غوښتنه کوي چې د داسې پېښو د مخنیوي لپاره د عامه پوهاوي پروګرامونه پراخ کړي او د کورنیو شخړو د حل لپاره اغېزمن میکانیزمونه رامنځته کړي.
کارپوهان باور لري، چې د کورني تاوتریخوالي زیاتوالی نه یوازې د کورنیو د ړنګېدو سبب کېږي، بلکې پر ماشومانو، ښځو او ټولنې ژورې رواني او ټولنیزې اغېزې هم پرېږدي. دوی ټینګار کوي چې د ستونزو حل د خبرو، مشورو او قانوني لارو چارو له لارې ممکن دی، نه د زور او تاوتریخوالي له لارې.
اوس مهال امنیتي ادارې وایي، د پېښې په اړه نورې څېړنې روانې دي او دوسیه به د قانوني اجراآتو لپاره اړوندو عدلي او قضايي ارګانونو ته وسپارل شي.
