ترکیې د خپلو لیرې واټن ویشتونکو دفاعي وړتیاوو په برخه کې د یوې مهمې لاسته راوړنې په توګه، د سې شنبې په ورځ په استانبول کې د “ساها ۲۰۲۶” دفاعي نندارتون په ترڅ کې د لومړي ځل لپاره خپل د براعظمونو ترمنځ بالستیک توغندی «یلدرم هان» په عامه توګه نندارې ته وړاندې کړ.
د ترکیې د دفاع وزارت د څیړنې او پراختیا مرکز لخوا د جوړ شوي دغه توغندي په اړه ویل شوي چې دا توغندی تر ۲۵ مایک (Mach 25) پورې سرعت نیولی شي، په داسې حال کې چې د ویشتلو حد یې نږدې ۶ زره کیلومتره (۳۷۲۸ میله) دی.
د چارواکو په وینا، د «یلدرم هان» سیسټم د سون توکو په توګه له مایع نایتروجن ټیټرو اکسایډ څخه ګټه پورته کوي او په څلورو راکټي انجنونو سمبال دی، چې له امله یې دا د ترکیې تر ټولو پرمختللی توغندیز پلیټ فارم ګڼل کیږي.
ترکۍ خبري اژانس، انادولو راپور ورکړی چې دغه توغندی په “ساها ۲۰۲۶ نړیوال دفاعي او فضایي نندارتون” کې وړاندې شو، چیرته چې د ترکیې لویو دفاعي شرکتونو او دولتي ادارو په بیلابیلو برخو کې نوي ټیکنالوژۍ نندارې ته ایښې وې.
دا پرمختګ په داسې حال کې مخې ته راځي چې ترکیه د خپل دفاعي صنعت د پراخولو لپاره د توغندیو په سیسټمونو، بې پیلوټه الوتکو، هوايي دفاع، هوايي چلند او فضایي ټیکنالوژۍ کې پراخه پانګونه کوي.
د «ساها ۲۰۲۶» نندارتون، چې د «ساها استانبول» لخوا تنظیم شوی، د سیمې یو له مهمو دفاعي پیښو څخه شمیرل کیږي چې پکې د نړۍ دفاعي شرکتونه، نظامي پلاوي او د پیرودلو مسؤل چارواکي ګډون کوي.
