د پولیسو د معلوماتو له مخې، د بلوچستان د ګوادر ولسوالۍ د جیوني سیمې په پانوان کې د پاکستان کوسټ ګارډز پر یوې پوستې د ځانمرګي موټر برید شوی، چې له امله یې د پاکستان کوسټ ګارډز درې سرتېري او د پوځ یو سرتېرى وژل شوي او ۱۶ نور امنیتي سرتېري ټپیان شوي دي.
د پولیسو سرچینو ویلي، برید د جمعې په ماښام شاوخوا اووه بجې هغه مهال ترسره شو، کله چې له چاودېدونکو توکو ډک یو موټر په چټکۍ سره د پوستې د اصلي ودانۍ سره وجنګېد. د زورورې چاودنې له امله د پوستې د ودانۍ لویه برخه ونړېده او د چاودنې غږ لرې سیمو ته هم واورېدل شو.
د راپورونو له مخې، په یادې پوستې کې د پاکستان کوسټ ګارډز د درېیمې کنډک او د پنجاب رجمنټ د ۳۲مې واحد شاوخوا ۲۰ امنیتي سرتېري ځای پر ځای وو. دغه پوسته د جیوني ښار شاوخوا لس کیلومتره لرې د ساحلي سیمې د امنیت او څارنې لپاره په مهم موقعیت کې جوړه شوې ده.
د پېښې له رامنځته کېدو وروسته د ګوادر ولسوالۍ پولیس، فرنټیر کور او د قانون پلي کوونکو نورو ادارو ځواکونه سیمې ته ورسېدل، سیمه یې کلابنده کړه او د ژغورنې او پلټنې عملیات یې پیل کړل.
ټپیان لومړی د جیوني او ګوادر روغتونونو ته ولېږدول شول، او یو سخت ټپي سرتېرى د لا ښه درملنې لپاره ګوادر ته انتقال شوی دی.
امنیتي ادارو د برید د څرنګوالي په اړه پلټنې پیل کړې دي، او په سیمه کې امنیتي تدابیر نور هم سخت شوي دي.
