لږ تر لږه ۲۴ کسان هغه مهال مړه او اته نور ټپیان شول، چې د مسافرو یو بس د جمعې په ورځ د بلوچستان د شیراني ولسوالۍ د دنهسر له سیمې د وتلو وروسته، د خیبر پښتونخوا د ډېره اسماعیل خان پولې ته نږدې ژورې درې ته ولوېد.
د شیراني ولسوالۍ مرستیال کمېشنر ولي خان کاکړ ویلي، د پېښې له رامنځته کېدو سره سم د ژغورنې ډلې او امبولانسونه سیمې ته ورسېدل او د ژغورنې عملیات یې پیل کړل. د هغه په وینا، ټپیان نږدې روغتونونو ته لېږدول شوي او د ژغورنې چارې روانې دي.
د نوموړي په خبره، یاد بس له کوټې څخه د ۳۶ مسافرو په لېږد راروان و، خو په لاره کې د بل خراب شوي بس یو شمېر سپرلۍ هم ورسره یوځای شوې.
بلخوا د بلوچستان حکومت د دې پېښې له امله خواشیني څرګنده کړې او د وژل شویو له کورنیو سره یې خواخوږي ښودلې ده. د حکومت په وینا، د بلوچستان اعلی وزیر سرفراز بګټي اړوندو ادارو ته سپارښتنه کړې چې د ژغورنې او مرستو چارې لا چټکې کړي.
چارواکي وایي، د پېښې د علت په اړه څېړنې روانې دي او ښايي د مړو او ټپیانو شمېر د ژغورنې د عملیاتو له بشپړېدو وروسته بدلون ومومي.
